தமிழகத்தில் 2026ஆம் ஆண்டுக்கான 10, 11 மற்றும் 12ஆம் வகுப்பு பொதுத்தேர்வுகள் மார்ச் மாதம் முதல் தொடங்க உள்ளன. தேர்வுகள் நெருங்கிவரும் நிலையில், மாநிலம் முழுவதும் தேர்வு தயாரிப்புகள் தீவிரப்படுத்தப்பட்டுள்ளன.
12ஆம் வகுப்பு பொதுத்தேர்வு மார்ச் 2 முதல் மார்ச் 26 வரை நடைபெறும். 11ஆம் வகுப்பு தேர்வு மார்ச் 3 முதல் மார்ச் 27 வரை நடத்தப்படுகிறது. 10ஆம் வகுப்பு பொதுத்தேர்வு மார்ச் 11 முதல் ஏப்ரல் 4 வரை நடைபெற உள்ளது.
தேர்வுகளை முன்னிட்டு சென்னை அண்ணா சாலையில் உள்ள தேவநேயப் பாவாணர் மாவட்ட மைய நூலகத்தில் ஆலோசனை கூட்டம் நடைபெற்றது. இதில் 2026 பொதுத்தேர்வுகளுக்கான புதிய நடைமுறைகள் குறித்து முக்கிய முடிவுகள் எடுக்கப்பட்டன.
புதிய நடைமுறைகள் என்ன?
இந்த ஆண்டிலிருந்து 12ஆம் வகுப்பு கணக்குப்பதிவியல் (Accountancy) தேர்வு எழுதும் மாணவர்கள் சாதாரண கால்குலேட்டரை பயன்படுத்த அனுமதி வழங்கப்பட்டுள்ளது. மாணவர்கள் தங்களது கால்குலேட்டரை கொண்டு வரலாம் என அறிவிக்கப்பட்டுள்ளது.
மாற்றுத்திறனாளி மாணவர்களுக்காக கூடுதல் ஏற்பாடுகள் செய்யப்பட்டுள்ளன. அவர்களுக்கு உதவும் வகையில் சொல்லிச் எழுதுபவர்களாக தன்னார்வலர்கள் மற்றும் பயிற்சி பெற்ற மாணவர்கள் தேர்வு செய்யப்பட்டு பயிற்சி அளிக்கப்பட்டுள்ளது.
மாற்றுத்திறனாளி தேர்வர்களுக்காக ஐந்து விதமான வினாத்தாள்கள் வழங்கப்படும். வினாக்களின் வரிசை மாற்றப்பட்டிருக்கும். மேலும் இயற்பியல், வேதியல், கணிதம், வணிகக் கணிதம் மற்றும் புள்ளியியல் பாடங்களுக்கு லாகரிதம் புத்தகங்கள் பெரிய எழுத்துக்களில் A4 அளவில் வழங்கப்படும்.
வினாத்தாள் பாதுகாப்பை வலுப்படுத்தும் நோக்கில் புதிய நடைமுறை அறிமுகப்படுத்தப்பட்டுள்ளது. பயன்படுத்தப்படாத வினாத்தாள்கள் தேர்வு அறையிலேயே மாணவர்கள் முன்னிலையில் சீல் செய்யப்படும். இதன் மூலம் வெளிப்படைத்தன்மை உறுதி செய்யப்படும்.
தனித்தேர்வர்களுக்கான புதிய சரிபார்ப்பு முறையும் அறிமுகப்படுத்தப்படுகிறது. ஆதார் அட்டை மூலம் இருப்பிட விவரங்கள் சரிபார்க்கப்பட்டு பதிவேற்றம் செய்யப்படும். இதனால் மாணவர்கள் தங்கள் சொந்த மாவட்டத்திலேயே தேர்வு எழுதும் வசதி ஏற்படுத்தப்பட்டுள்ளது.
தேர்வு புள்ளிவிவரம்:
12ஆம் வகுப்பு பொதுத்தேர்வுக்கு 8,27,475 தேர்வர்கள் பதிவு செய்துள்ளனர்.
11ஆம் வகுப்பு தேர்வுக்கு 25,051 பேர் பங்கேற்க உள்ளனர்.
10ஆம் வகுப்பு தேர்வுக்கு 9,09,002 மாணவர்கள் தேர்வெழுத உள்ளனர்.
மேல்நிலைப் பொதுத்தேர்வில் 281 சிறைவாசிகளும், பத்தாம் வகுப்பில் 395 சிறைவாசிகளும் தேர்வெழுதுகின்றனர்.
12ஆம் வகுப்பு தேர்வு 3,412 மையங்களில், 11ஆம் வகுப்பு 2,615 மையங்களில், 10ஆம் வகுப்பு 4,219 மையங்களில் நடைபெறும். மொத்தம் 17,61,528 தேர்வர்கள் இந்த ஆண்டுக்கான பொதுத்தேர்வில் பங்கேற்க உள்ளனர்.
ஒவ்வொரு தேர்வு நாளிலும் சுமார் 49,000க்கும் மேற்பட்ட ஆசிரியர்கள் தேர்வுப்பணியில் ஈடுபடுவார்கள். முறைகேடுகளைத் தடுக்கும் வகையில் 4,900க்கும் மேற்பட்ட பறக்கும் படையினர் கண்காணிப்பில் இருப்பார்கள்.
இந்த ஆண்டு அறிமுகப்படுத்தப்பட்டுள்ள புதிய நடைமுறைகள் தேர்வு பாதுகாப்பையும், மாணவர்களுக்கு தேவையான வசதிகளையும் மேம்படுத்தும் நோக்கத்துடன் செயல்படுத்தப்பட்டுள்ளதாக கல்வித்துறை தெரிவித்துள்ளது.